Geagte Familie Wêreldwyd,

Hiermee wil ek graag bekend maak dat die Labuschagne Familie Bond op 23 April 2006 sy eerste bestuursvergadering gehad het.

Die vergadering het versoek dat ek ‘n klein verslag met almal moet deel wat almal darem op hoogte sal hou van sommige van die hoogtepunte van die dag. Hierdie is nie ‘n notule nie, maar eerder net ‘n kort opsomming, sodat ons lesers nie verveel hoef te word met onnodige fynere besonderhede nie. Dit stel enigeen natuurlik vry om die bondbestuurslede enige tyd te skakel indien daar meer spesifieke vrae mag wees.

Wat die bestuur aanbetref: Aan die voorpunt van die slagorde, is Hennie Labuschagne verkies as voorsitter, met myself, as onder-voorsitter. Sekretaris is Esperanza Labuschagne, en die tesourier is Grieta Labuschagne.

Familiewapen

Herman en Les Labuschagne is versoek om ‘n besoek aan die Staatsheraldikus in Pretoria te bring ten einde die tegnikaliteite omtrent die ontwerp en registrasie van ‘n familiewapen te bespreek.

Intussen was daar ook besluit om al die Labuschagnes te vra dat almal wat oor ‘n Labuschagne familiewapen van enige soort of ontwerp mag beskik, tog ‘n kopie daarvan aan ons sal stuur. Hierdie kopieë kan dan aan die Staatsheraldikus voorgelê word om die egtheid daarvan te bevestig. 

So ook wil ons almal graag vra dat enigiemand wat voorstelle kan maak omtrent watse simbole op ‘n nuwe familiewapen gebruik moet word, die bestuur asseblief sal laat weet. Algemene simbole wat gebruik word op baie familie wapens, is gewoonlik simbole soos chevrons (>>> of <<<), of die Franse lelie, ook bekend as die fleur-de-lis, of swaarde, of bome, aambeelde, perde, leeus, visse, seilbote, sterre, geometriese patrone, en letterlik honderde ander ikone. As enigeen spesifieke idees vir ‘n ontwerp het, laat weet ons asseblief so gou moontlik. Ons sal graag wil sien dat almal wat belang stel, ‘n inset gehad het by die ontwerp en keuse van ‘n familiewapen. Die beste sal dalk wees om myself direk te kontak by genealogy@sfmetalpressings.com of by 011 474 8094, kantoor-ure.

: